اسكربيت للكاتبة رحمة طارق

هناكل أية بقى
حكاية الحب خلصت المشاعر الأولية الرغبة في الوجود والتودد والقرب والخۏف من البعد وسهر الليالي وجنون الغيرة وحواديت السهرة انتهت. 
طب والي جاي 
الشوط الأولى 
الحكاية الحقيقة.
فتحت الستاير وروقت البيت وبخرته وشغلت القرآن. 
ودخلت المطبخ اعمل الفطار. قبل الجواز نزلنا أنا وزين وجبنا شوية كتب عن العلاقات الزوجية وكيفية بناء بيت سليم طبعا هو مبيحبش القراءة فكسل ميأستش خالص جبت فيديوهات دورات تدريبية عن الزواج وبعتله اللينكات وكنت بسأله فيها أيوة مفيش ثقة عادي.
المهم طلعنا من الكتب والفيديوهات بشوية قيم وتفاصيل صغيرة أولهم.. التقبل. 
صباح الخير. 
صباح النور. 
شد الفوطة على كتفه بإهمال وقع مخدة الركنة بدراعه ودخل الحمام ورجل بنطلون مرفوعة والرجل التانية لا طبعا أنا المنظر دا بيعصبني لأني عندي وسواس ترتيب ولكن لأنه زين مضطرة أتحمل.
فطار يا ناس عاوز فطار أي سندوتش أسند بيه جسمي. 
غمضت عيني ورديت بصبر 
ما أنا بعمل أهو خيار الي في إيدي دا ولا مش خيار 
وريني كدا. 
رفعت إيدي فباسها على غفلة. 
لا مش طعم الخيار اتقي الله بقى. 
انت كدا هتخليني اعملك فطار ملوكي لعلمك 
أنت وذوقك بقى. 
تاني نقطة.. التقدير أبسط الحاجات لو قولنا شكرا عليها هيتكون جوانا إحساس عظيم بالرضا وهنشوف إن مهما نتعب فهو ولا حاجة بجانب راحة وابتسامة الطرف التاني.
شكل زين مزعلك. 
ابتسمت ابتسامة هادية وخبيت مشاعري كلها. 
خالص زين كويس معايا جدا. 
اومال مالك 
محتارة يا ماما بصي أنا كنت عاوزة أسألك سؤال مش ساعات بابا كان بييجي من برا متضايق ومش طايق نفسه كنت بتعملي معاه أية في الموقف دا 
ابتسمت وفهمت إني مش عايزة أتكلم وقالت هقولك.
تالت نقطة وتعتبر أكتر نقطة إهمالها يتسبب في خړاب البيت هي حفظ أسرار البيت. أمي ماشي وعلى عيني وراسي لكن هو مش ابنها مهما قالت إنها بتحبه يوم ما تشوف زعلي منه هتقلب عليه فالشكوى لحد بيحبك مش هتصلح بالعكس هتكبر المشكلة لكن لو بدلنا الشكوى بطلب النصيحة خصوصا لو الموضوع بسيط هتفرق كتير أوي.
رجعت البيت بشحنة نصايح هايلة في كيفية جلب الحبيب أقصد الزوج بنص نظرة وبدون أدنى مجهود وبدأت أطبقها خطوة بخطوة. 
مساء الخير.
كنت برتب البيت بسرعة علشان مامته معزومة على الغدا عندنا وزمانها جاية. استنيت تلت ثواني وصلت فيهم رسالة إني زعلانة ومش عاوزة أسمع صوته وبعدين رديت بكل أدب وذوق  
مساء النور. 
لعب في مفاتيحه بصمت وانا تجاهلت إنه واقف جنبي وتجاهلت أسأله يومك كان عامل أية يا قمر. أحسن يستاهل علشان يعرف قيمتي كويس. 
أساعدك 
في وقت تاني كنت هقوله همتك معايا يا وحش. 
ولكن لأني في وضع الزوجة الصامتة هزيت راسي ب لا. 
اعمل معاكي اي حاجة يعني 
كتمت ابتسامتي ونفضت الركنة بقوة فرجع لورا خطوة.
شكرا أنا هحضر الغدا.